АСТАНА, 30 желтоқсан — Sputnik. Бұрынғы полицейлер есірткіні қолданып, сатқандары үшін айыпты деп танылды. ОҚО қылмыстық істер бойынша мамандандырылған ауданаралық сотында Абай АІІБ бұрынғы төрт қызметкері – Біржан Баязеров, Нұрсұлтан Алғи, Тимур Ділдәбеков, Нұрсұлтан Досполвқа үкім шығарылды, деп жазады "Отырар" басылымы.
"Үш адам "Қылмысқа дайындалу", "Есірткіні заңсыз сату", "Есірткі пайдаланбақ болу" баптары бойынша айыпты деп танылып, бес жылға бас бостандығынан айырылды. Төртінші жігіт есірткіні пайдаланбақ болды деген айыппен сотталған. Марихуананы сатар кезде ол оқуда болыпты. Сондықтан үш жылға ғана сотталды. Барлығы шенінен айырылып, құқық қорғау органдарында жұмыс істеуге он жыл тыйым салынды", — деді сот өкілі Әбинұр Қарабаев.
Сотталушылар айыбын мойындаған жоқ. Олардың айтуынша, шынайы қылмыскерлерді ұстамақ болып, өздері қармаққа түскен. Үкім заңды күшіне әлі енбеді.
