АСТАНА, 21 желтоқсан — Sputnik. БҰҰ Сирия бойынша арнайы өкілі Стаффан де Мистура Сирия бойынша келіссөздерге қатысу үшін жұма күні Астанаға келеді, деп хабарлады сыртқы істер министрлігі баспасөз қызметі басшысы Әнуар Жайнақов Sputnik Қазақстан агенттігіне.
Сириядағы қақтығысты реттеу бойынша кездесулердің сегізінші раунды елордамызда 21-22 желтоқсан күндері өтеді.
"Барлық қатысушылар, делегациялар, оның ішінде БҰҰ өкілдері Астанаға келді. БҰҰ делегациясы басшысы Стаффан де Мистура Астанаға ертең таңертең келеді. Сириялық оппозициядан 20-дан астам адам болады", — деді Жайнақов Sputnik Қазақстан агенттігіне.
Оның сөзіне сүйенсек, Астанала сарапшылар кездесуі бейсенбі күні басталып кетті, ол жабық режимде екі жақты және көпжақты форматта өтеді. Кездесу барысында техникалық мәселелер қарастырылмақ. Жалпы отырыс жұмаға жоспарланған.
