Сағынтаев мемқызметтерді электронды форматқа ауыстыруды жеделдетуді тапсырды

АСТАНА, 20 желтоқсан — Sputnik. ҚР премьер-министрі Бақытжан Сағынтаев үкімет отырысында мемлекеттік қызметтерді электронды форматқа ауыстыру мерзімін жеделдетуді тапсырды, деп хабарлайды Sputnik Қазақстан тілшісі. 

Премьер-министр Бақытжан Сағынтаев электронды түрде көрсетілетін қызмет сапасын жетілдіру қажеттігін айтты. 

"Халыққа электронды қызмет көрсету бойынша үлкен жұмыс жүріп жатқанын көріп отырмыз. Бұл мәселе үкіметте де талай мәрте қаралды. "Цифрлы Қазақстан" бағдарламасы қабылданғаннан кейін жаңа деңгейге шығу керек. Егер мұқият назар салсақ, қызмет сапасына қатысты атқаратын шаруа көп. Мәселе көрсетілетін қызметтердің санында емес, сапасында, қалай көрсетіліп жатқанында. Халық электронды қызметтің сапасыз жүргізіліп жатқанын сезсе, әрине, ол қағаз анықтамаға жүгінеді. Бұл ретте мемлекеттік органдар өзінің тәсілін өзгертуі тиіс", — деді Сағынтаев. 

Премьер электронды қызметтерді енгізу мерзімін жеделдетуді тапсырды. 

"Слайдтарды қарап отырмын, біз 2020 жылға дейін жоспар құрып қойыппыз. Электронды, цирфлық әлем лезде өзгереді. Бұл жоспар екі-үш жылдан керексіз болып қалуы мүмкін, мүлде басқа технологиялар шығуы мүмкін. Мәселен, мүгедектікті анықтауды 2019 жылдың ортасында іске қосамыз деп жоспарлап отырмыз. Бұл нағыз өзекті мәселе, мұны қазір шешу керек. Аяқ-қолы жоқ мүгедек адам енді екі жыл күтуі керек пе? "Цифрлы Қазақстан" бағдарламасын қабылдадық деп бүкіл әлемге жар салдық. Ал жарымжан жандарға көмек көрсетуді ең соңғы орынға ысырып қойып отырмыз. Дұрыс па осы? Менің ойымша, дұрыс емес. Сондықтан бұл мәселеге аса көңіл бөлу қажет", — деді Сағынтаев.