АСТАНА, 16 желтоқсан — Sputnik. Астаналық саябақта алғаш рет қыста елорда тұрғындары мен қонақтарына ойын-сауық пен қысқы демалыс ұйымдастырылады, деп хабарлайды қалалық мәдениет, мұрағаттар және құжаттама басқармасы.
Астаналық саябақ – қаладағы ең ескі және тұрғындардың сүйікті орындарының бірі. Нақ осы себептен мұнда белсенді демалысты ұнататындар үшін үлкен мұз айдыны, биік сырғанақ пен "Bubble tab" қысқы аттракционы ("Карусель на плюшках") жасалды. Балалардың жүрегін жаулап үлгерген аттракцион Астанада былтыр ашылған болатын.
Саябақтағы сырғанақтың биіктігі – 4 метр, ал сырғанау жолы – 50 метрден асады. Мұз айдынының көлемі – 600 шаршы метр, айналасында ағаштар бар, кешкі және түнгі уақытта жарықтандырылып, керемет романтикалық атмосфера сыйлайды.
Мұз айдыны мен сырғанақ демалуға келгендер үшін тегін. Мұнымен қоса, коньки, тюбинг және шананы жалға беру пункті, стационарлық дәмхана мен мейрамхана жұмыс істейді.
