АСТАНА, 14 желтоқсан — Sputnik. Алматы – Өскемен тасжолында жеті автокөліктің соқтығысуынан бес адам зардап шекті, деп хабарлайды Sputnik Қазақстан тілшісі.
Жол апаты бейсенбі күні таңертең Іле ауданында Алматы – Өскемен автожолының 29-шақырымында болған. Hyundai Sonata, Nissan Qashqai, Mitsubishi Galant, үш Toyota Camry және Howo жүк көлігі соқтығысты.
Жол апатынан бес адам зардап шекті, олар әр түрлі жарақатпен жақын маңдағы ауруханаға жатқызылды.
Алматы облысы ІІД баспасөз қызметі жол апаты болғанын растап, оқиға орнында Іле АІІБ және облыстық жол полициясы қызметкерлері жұмыс істеп жатқанын хабарлады.
Алдын ала мәлімет бойынша, апатқа жүргізушілердің қажетті қашықтықты сақтамауы себеп болған.
