Алматыда бұзақылардан қашқан жас жігіт жүк көлігінің астына түсіп өлді

АСТАНА, 1 желтоқсан — Sputnik. Алматыда Райымбек даңғылында бұзақылардан қашамын деп жас жігіт жүк көлігінің астына түсіп өлді, деп хабарлайды Sputnik Қазақстан тілшісі. 

"Алтын орда" және "Бірлік" базарларының арасында екі адамға бір топ жігіт тап берген. Екеуі бұзақылардан екі жаққа қаша жөнелгенде, жігіттердің біреуін Райымбек даңғылындағы жолда жүк көлігі қағып кетеді. Көлік жүргізушісі тоқтап үлгере алмай, алдынан атып шыққан адамды соққан. 23 жастағы жігіт жедел жәрдем келгенше көз жұмады. 

Кейін Сейфуллин көшесінде тағы бір жол апаты болған. Жеңіл автокөліктің жүргізушісі жаяу жүргіншілер жолымен өтіп бара жатқан 40 жастағы ер адамды қағып кетеді. Азамат алған жарақаттардан апат орнында жан тапсырды.