АСТАНА, 22 қараша— Sputnik. Таяуда Талдықорғанда болған жантүршігерлік жол апаты жайлы Алматы облысының полицейлері ұйымдастырған краш-курста көз жұмған баланың туыс әпкесі – мектеп оқушысы айтып берді, деп хабарлайды patrul.kz.
Nexia жүргізушісі «Жаяу жүргіншілер жолағы» деген белгіні елемей, тура жолақ үстімен өтіп бара жатқан екі баланы қағып кеткен. Оқушы қыз ажалдан аман қалды, ал оның 5 жасар жиен інісі сол жерде көз жұмды. Бұл сұмдық оқиғаны сонда барған дәрігерлер мен полицейлер де еске түсірді. Аман қалған қызға сол сәтті еске алудың өзі оңай емес екені көрініп тұрды.
Сол күні әкесінің туған күні еді. Мектептен кейін қосымша сабақтары біткен соң оқушы балабақшадан жиен інісін алып келетін болды. Олар үйлеріне асыққан. Отбасылық мереке құрметіне жайылған дастарқан басында туысқандар жиналып та қалған. Бірақ…балаларының үйлеріне аман-сау оралуын көру олар үшін арман болып қалды.
Бұл оқиға жайлы сол жерге көмекке жеткен дәрігерлер де, полицейлер де сезімдерін жасыра алмай, әңгімелеп берді. Тамақтарына өксік тығылып, сөздері әрең шықса да, олар жиналғадардан әр кезде жолда абай болуды және жол ережелерін бұзбауды өтінді.
