АСТАНА, 22 қараша — Sputnik. Қазақстанда сотталғандар санының азаюына байланысты колониялар жабылып жатыр. Бұл туралы ІІМ мемлекеттік тіл және ақпарат департаментінің директоры Алмас Садубаев мәлімдеді.
Оның айтуынша, бүгінде республика қылмыстық заңнаманы ізгілендіру және қоғамнан оқшаулаумен байланысты емес қылмыстық жазаларды қолдану аясын кеңейту бағытында жұмыс жүргізіп жатыр.
"Соңғы жылдары елдің "түрме халқы" едәуір азайды. Мәселен, 2011 жылы 57 мың сотталған азамат болса, биыл олардың саны – 35,5 мың", — деді Садубаев.
Егер 15 жыл бұрын Қазақстан сотталғандар саны жағынан әлемдік рейтингте АҚШ пен Ресейден кейінгі үшінші орында тұрса, қазір еліміз – 68-орында.
"Сотталғандар санының қысқаруына байланысты, министрлік коммуналдық-тұрмыстық жағдайы нашар мекемелерді жою туралы шешім қабылдады. Осылайша, соңғы бір жарым жыл ішінде жеті колония оңтайландырылды",- деді Садубаев.
