АСТАНА, 17 қараша — Sputnik. Жеңіл көлік пен автобус соқтығысқан жол апаты Алматы қаласында Алтынсарин және Жұбанов көшелерінің қиылысында болған, деп хабарлады құқық қорғау органдары Sputnik Қазақстан агенттігіне.
Куәгерлердің айтуынша, 103 бағдарлы автобус Алтынсарин бойымен солтүстік бағытқа бағдаршамның жасыл жарығына кетіп бара жатқан. Toyota Camry – Жұбанов бойымен шығыс бағытта.
Бағдаршамның қызыл жарығын ескермеген жүргізуші автобусты бір-ақ қаққан. Қатты соққыдан автобус пен Toyota бордюрге шығып кетіп, жеңіл көлік ағашқа соғылыпты.
Жол апатынан екі адам зардап шекті — Toyota Camry жолаушысы мен автобус жүргізушісі. Олар әртүрлі жарақатпен ауруханаға жатқызылған.
Toyota Camry рөліндегі жүргізуші жол апаты орнынан қашып кетті.
Болған істің мән-жайын полиция анықтайды.
