АСТАНА, 15 қараша — Sputnik. Қазнетте "Халық банктің" фойесінде бір әйелдің «көктен жауған» банкноттарды қағып алып жатқан сәті түсірілген видео тарады. Банктің баспасөз қызметі Sputnik Қазақстан агенттігіне мұның себебін түсіндірді.
Видео, болжам бойынша, смартфонның камерасына түсірілген. Роликтен бір әйелдің қызғылт түсті кабинканың ішіндегі батутта тұрып, жоғарыдан "жауып жатқан" ақшаны қағып алып жатқаны көрінеді.
"Халык банк" қаржыгер күнін атап өтіп жатыр, банктің кез келген клиенті қанша ақша жинап үлгереді, соншасын алып кетеді", — деп жазылған видео астына.
"Әртүрлі елдің ақшасы бейнеленген қағаздар шын банкнот емес. Ұлттық валюта күні құрметіне тосын сый ұйымдастырдық. Бұл ішкі шара, тек қызметкерлерге ғана арналған", — деп хабарлады баспасөз қызметі.
Бүгін елімізде Ұлттық валюта күні аталып өтіп жатыр. 1993 жылдың 15 қарашасында теңге айналымға енген болатын.
