АСТАНА, 12 қараша – Sputnik. Павлодар облысынан шыққан боксшы Мұса Тұрсынғалиев Мексикадағы кәсіпқой бокстағы алғашқы жекпе-жегінде қарсыласын нокаутқа түсірді. Бұл туралы спортшы Instagram-дағы жеке парақшасында хабарлады.
Жекпе-жек 2017 жылдың 10 қарашасында Мексиканың Канкун қаласында өткен. Мұсаның қарсыласы мексикалық Хесус Видаль болды.
Бұған дейін қазақстандық боксшы алғашқы жекпе-жегін АҚШ-та басқа спортшымен өткізуі тиіс болғанын, бірақ қарсыласы Жемур Эдвардс салмақ өлшеу рәсімінен кейін денсаулығына байланысты кездесуден бас тартқанын жазған еді.
БАҚ-та Екібастұз қаласының тумасы Мұса Тұрсынғалиев The Heavyweight Factory промоутерлік компаниясымен келісімшартқа отырғаны хабарланған болатын. Айта кетейік, бұл компаниямен тағы бір қазақстандық боксшы Иван Дычко келісімшарт жасасқан.
