АСТАНА, 3 қараша — Sputnik. Sputnik Қазақстан агенттігінің "Қасиетті Қазақстан" арнайы жобасы Орынборда "Еуразия кереметі" халықаралық фестивалінде "Аумақтық презентация" номинациясында бірінші орынды иеленді.
"Еуразия кереметі" халықаралық конкурс-фестивалі Орынборда (Ресей) 2-3 қарашада өтті.
Фестивальге 32 ел қатысып, тарихи, табиғи және өзге де көз тартарлық орындар жайлы 212 жоба ұсынылды.
"Аумақтық презентация" номинациясында Sputnik Қазақстанның "Қасиетті Қазақстан" арнайы жобасы бірінші орынды алды.
"Тамаша жоба. Қазақстанда осындай әдемі жер бар екеніне қатты таңғалдым. Мұндайды Австралияда көрген сияқты едім. Не айтайын? Көңілді толқытты", — деп атап өтті әділ-қазылардың бірі Василий Козлов.
Сондай-ақ фестивальде "Табиғи нысандар" номинациясында ақтаулық "Маңғыстау: сананы өзгерте отырып саяхатта" жобасы екінші орынды иеленді. Оның суреттерін Sputnik Қазақстан фототілшілері Анатолий Устиненко мен Серікжан Қобыланбаев түсірген болатын.
