АСТАНА, 19 қазан — Sputnik. Ғарыштық түсірілімдерден Қазақстан аумағында суық фронттардың белсенді бұлтты массиві байқалады, деп хабарлайды Қазгидромет.
Жақын тәулікте республиканың оңтүстік және оңтүстік-шығыстың кей жерлерінде жауын жауады. Суық фронттың артынан Кавказ ауданынан антициклон таралады, соған байланысты республика аумағында жауын-шашын тоқтап, температура төмендейді.
Ресейдің еуропалық бөлігінің солтүстік аймақтарынан Батыс Сібірге қарай кезекті циклон жылжып келеді. Ол Қазақстаннан алыс орналасқан болса да, оған кіретін арктикалық атмосфералық фронттар жүйесі 20-21 қазан аралығында республиканың батыс және солтүстік облыстары арқылы жылжитын болады, соның әсерінен жауын-шашынды болады.
