АСТАНА, 12 қазан – Sputnik. Синоптиктер қараша айында ауа райы қандай болатынын айтты деп хабарлайды Sputnik Қазақстан.
"Қараша айы жауын-шашынды, желді, таңғы және түнгі сағаттарда тұман басып, көктайғақ болады деп күтілуде. Еліміздің солтүстік, орталық және шығыс өңірінде айдың ортасында қар жауып, бұрқасын соғады", — деп хабарлады орталық коммуникациялар қызметінде өткен баспасөз мәслихатында "Қазгидромет" РМК ауа райының ұзақ мерзімді болжамдар басқармасының басшысы Гүлмира Ақышева.
Синоптик қыстың ызғарын айдың соңында сезіне бастайтынымызлы айтты.
"Бұл кезде еліміздің солтүстік, орталық және шығыс өңірінде сынап бағанасы түнде – 30 градусқа дейін, ал күндіз – 15 градусқа дейін төмендейді. Еліміздің оңтүстігінде түнде – 15, ал күндіз 5 градус аяз шамасында болмақ", — деді ол.
"Тұрақты қардың жамылғысы еліміздің солтүстігінде қарашаның ортасында байқалса, еліміздің оңтүстік және батыс өңірінде желтоқсан айының екінші жартысында түседі деп болжанып отыр", — деді Ақышева.
