Астанада автобустың кесірінен он көлік жол апатына ұшырады

АСТАНА, 23 тамыз – Sputnik. Астанада №9 бағдарлы автобустың қатысуымен ірі жол апаты болды, деп хабарлайды Sputnik Қазақстан тілшісі оқиға орнынан.

Жол апаты Кенесары көшесі бойында Республика көшесімен қиылысар жерде болған.

Зардап шеккендердің мәліметінше,  №9 автобус көліктерді шетінен келіп қаққан.

"Кептелісте тұрғанбыз, кенеттен автобус келіп соқты. Мен үшінші болып тұрғанмын. Ол бәрімізді шетінен қақты. Шамамен он көлік. Үш адамды жедел жәрдем алып кетті", — деп хабарлады жол апатына ұшырағандардың бірі.

Автобус жүргізушісі оқиға орнында, ештеңе айтуға мұршасы келмеді, қатты есеңгіреп қалған. Кей мәлімет бойынша, автобустың тежегіші істемей қалыпты.

Автобус паркінің өкілдері пікір білдіруден бас тартты.