АСТАНА, 21 тамыз – Sputnik. Алакөл көлінің маңындағы тас жолда жол талғамайтын көліктің аударылып қалуы салдарынан екі адам қаза тауып, тағы біреуі жарақаттармен ауруханаға жатқызылды, деп хабарлады Алматы облысы ішкі істер департаментінің баспасөз қызметі.
Апат 20 тамызға қараған түні Үшарал — Достық тас жолының 43-ші шақырымында орын алды. Онда жол талғамайтын Toyota Land Cruiser Prado көлігі аударылды.
Жол апаты салдарынан жол талғамайтын көліктің салонында болған екі ер адам оқиға орнында көз жұмды. Тағы бір жолаушы екі аяғы сынып, Алакөл аудандық ауруханасына жатқызылды.
Жол апаты дерегі бойынша тергеу басталды.
