АСТАНА, 18 шілде — Sputnik. Жібек жолы, Talgo пойызы, Қазақстандағы теміржол саласының дамуы, көліктік-логистикалық орталық, Нұрлы жол вокзалы мен жаңа әуежай терминалы – осының бәрі "ЭКСПО-2017" көрмесінде 400 шаршы метр аумақты құрайтын "Қазақстан темір жолы" АҚ павильонына сыйып тұр.
Павильондағы арнайы залда Қазақстандағы теміржол саласының даму тарихымен таныстыратын әртүрлі секторларды көруге болады.
Алғашқылардың бірі – көлік құрастыру саласының дамуы. "ҚТЖ" АҚ GR стратегия және корпоративтік даму департаментінің директоры Мұрат Бекмағамбетовтың сөзіне сүйенсек, бұл сала 2008 жылы General Electric, Alstom, Siemens, Talgo сияқты жаһандық трансұлттық компаниялармен серіктесе отырып, технологиялар трансфертін жүзеге асыру арқылы пайда болған. Елімізде салынған зауыттар технология трансфертіне мүмкіндік берді. Бұл заманауи станоктар, құрылғылар, тиімділігі жоғары, бірақ энергия аз жұмсалатын процестер.
"Тұлпар Тальго" пойызының көшірмесі де алыстан менмұндалап, көзге бірден түседі. Залдың ортасында үлкен плазмалық экрандар орнатылған, ал импровизацияланған карталарда заманауи Жібек жолының не екені, ҚТЖ компаниясының Еуразия құрлығындағы көліктік дәліздердің жаңа жүйесін дамытуға қосқан үлесі туралы айтылады.
Келушілер арнайы көзілдірік киіп, бір сәтке локомотив ішіне виртуалды сапар шегеді немесе тач-панель арқылы бар ақпаратты алады.
