АСТАНА, 14 шілде – Sputnik. Музыка саласына арналған Billboard америкалық басылымы әлемдегі ең бай 50 әртістің тізімін жариялады. Бірінші орында – миллиондап доллар табатын, 20 "Грэмми" сыйлығын иеленген Бейонсе Ноулз.
"Ханшайымға бас иіңіздер. Бейонсе биыл 62,1 миллион АҚШ долларын тауып, бәсекелестірінің ауызына құм құйды. Қаражаттың басым көпшілігін әнші Lemonade альбомы мен соған байланысты ұйымдастырған әлемдік турнесінің арқасында тапқан", — деп жазады басылым.
"Ханшайымның" соңынан тізім бойынша 42,3 миллион доллар тапқан Guns'N’Roses хард-рок-тобы, фолк-музыкант Брюс Спрингстин мен оның 42,2 миллион доллары және 2016 жылғы кірісі 37,3 "бакс" болған рэпер Дрейк ілесті.
Британдық әнші Адель бесінші орынды иеленсе, барбадостық сұлу қыз Рианна тіпті үздік ондыққа да іліге алмай қалды. Ол 22,3 миллион долларымен 12-орынға табан тіреді. Дегенмен, Пол Маккартни мен сэр Элтон Джоннан озып кеткен екен.
Әлемнің ең бай әртістері тізіміне Джастин Бибер, Барбара Стрейзанд, Бритни Спирс және Maroon 5 тобы кірді.
