АСТАНА, 29 мамыр — Sputnik. "ЭКСПО-2017" көрмесі қарсаңында Ақмола облысы әкімі "Бурабай демалыс орны — Астана" жолы бойында орналасқан дәмханаларды алты сағат бойы аралап шықты, деп хабарлайды облыс әкімдігінің баспасөз қызметі.
Ақмола облысы ЭКСПО-2017 көрмесі қарсаңында отандық және шетелдік туристерді қабылдауға дайындалып жатыр. Қонақтардың негізгі легі Ақкөл, Шортанды, Бұланды және Бурабай аудандары арқылы өтеді деп күтілуде.
Осыған байланысты жексенбі күні облыс әкімі Мәлік Мырзалин аудан әкімдері, басқарма басшылары "Қазавтожол" ҰК АҚ өкілдерімен бірге Астана-Щучинск жолы бойында орналасқан іскерлік нысандарын тексеріп шықты. Алты сағатқа созылған тексеру барысында әкім дәмханалар мен дүкендерді, жанармай бекеттерін, техникалық қызмет көрсету станцияларын, кемпингтермен, ақпарат стендтерін бағалады.
Тескеру жұмыстарының қорытындысы бойынша, әкім жол бойындағы қызмет көрсету орындарының санитарлық жағдайы, сыртқы көрінісі, өрт қауіпсіздігі, көгалдандыру мәселелерін қолға алуды тапсырды. Бұдан бөлек, Мырзалин үзіліссіз ұялы байланыспен қамтамасыз ету мәселесін ұялы операторлармен бірге реттеуге тапсырма берді.
