АСТАНА, 26 мамыр — Sputnik. Батыс Қазақстан облысында бірнеше жылқы тірідей өртеніп кетті. Жануарларды тасымалдап келе жатқан жүк көлігінде өрт тұтанып, жылқылар шыға алмаған, деп жазады жергілікті "Мой город" басылымы.
"Аталмыш дерек Жанғалы аудандық ішкі істер бөлімінде жазатайым оқиға ретінде тергелуде", — деп мәлімдеді облыстық ІІД.
Жануарларды жергілікті тұрғындар тауып, видеоға түсіріп алған екен.
"Бүгін 25 мамыр күні керемет ат жарыс болып еді. Содан көлікпен әкеле жатқан ғой. Көлікте өрт шығып, байғұстар жанып кетіпті. Бұл жерде төрт ат жатыр", — дейді куәгер.
Оның айтуынша, бір аттың жаны қиналмас үшін бауыздауға мәжбүр болыпты.
Өрттің қалай шыққаны туралы толығырақ мәлімет әзірге жоқ.
