АСТАНА, 24 мамыр — Sputnik. Қазақстандағы АҚШ елшісі Джордж Крол Димаш Құдайбергенді туған күнімен құттықтады.
АҚШ елшісі инстаграм арқылы Димашқа видеоқұттықтау жолдаған.
"Димаш, туған күніңмен құттықмаймын. АҚШ елшілігіндегі және Дипломатиялық миссиядағы барлық достарың мен жанкүйерлеріңнің игі тілегін жеткіземіз. Денсаулық, сәттілік және табыс тілейміз", — деген Джордж Крол.
Бүгін дарынымен және сирек кездесетін әсем даусымен қысқа уақытта әлемге танылып үлгерген Димаш Құдайбергеннің туған күні, әнші 23 жасқа толып отыр.
Айта кетейік, Қытайдағы Singer байқауы барысында қазақ әншісінің өнеріне тәнті болған белгілі әнші Лара Фабиан мен америкалық актриса Ева Лонгория Димаштың туған күніне орай видеоқұттықтау жолдады.
Димаш биыл туған күнін Қытайда атап өтеді. Әншінің PR-менеджері Алпамыс Шәрімов бұған дейін осы күні Бейжің қаласында Димаштың тұңғыш ресми әлемдік фан-кездесуі өтетінін хабарлаған болатын.
