АСТАНА, 15 мамыр — Sputnik. Құтқарушылар Қызылорда ЖЭС-да мұржаның опырылып түсуі салдарынан қаза тапқан ер адамның денесін үйінді астынан алып шықты, деп хабарлайды ҚР ІІМ Төтенше жағдайлар жөніндегі комитеттің ресми өкілі Руслан Иманқұлов.
Жексенбі күні кешке бөлшектеу жұмыстары жүргізіліп жатқанда, станцияның мұржасы бұзылған. Бөлшектеу жұмыстарын "Алтын ЛТД" ЖШС-нің екі жұмысшысы жүргізіп жатады, олардың бірі төтенше жағдай салдарынан ауруханаға жатқызылып, екіншісі үйінді астында қалған болатын.
"Бүгін 03:45-те Оңтүстік аймақтық аэромобильді жедел құтқару жасағының кинологиялық тобы үйінді астынан екінші жұмысшының денесін алып шықты", — деп хабарлады Иманқұлов.
Оқиға орнында 60 құтқарушы, оннан астам техника, екі кинологиялық топ жұмыс істеген.
