АСТАНА, 2 мамыр – Sputnik. Айдап әкетілген автокөлікті қираған күйінде тапқан, құқық бұзушылар іздестіріліп жатыр, деп хабарлады Sputnik Қазақстанға көзбен көрушілер. Автокөлік иесінің айтуынша, үйінде отырған кезде кішкентай қызы көшеден шу естіген, терезеден қараған сәтте Volkswagen Golf көлігін ұрлап кеткенін көреді.
Жәбірленуші бірден полиция шақырады. Оқиға орнына криминалистер келген. Кейіннен көлікті Рысқұлов даңғылы мен Ахременко көшесінің қиылысында қираған күйінде тауып алған. Анықталғандай, автокөлік Рысқұлов бойынан шығыс бағытында қатты жылдамдықпен қозғалған. Жүргізуші көлікті басқара алмай қалып металл опырғышына соқтығысады. Соққыдан көлік айналып кетеді. Автокөлікті айдап кетушілер полиция келгенге дейін қашып кеткен. Автокөліктің салонынан тас табылған. Терезені сол таспен сындырған болуы мүмкін. Қашқындар іздестіріліп жатыр.
ҚР ҚК-нің 200-бабына сәйкес, автокөлікті айдап әкету үшін 1000 АЕК көлемінде айыппұл салынады немесе екі жылға бостандығын шектеуге не болмаса бас бостандығынан айыруға сотталады. Егер ірі көлемдегі зиян келтірілген болса бес жылдан сегіз жылға дейін бас бостандығынан айыру жазасы тағайындалуы мүмкін.