Алматыда джип екі кісіні қағып өлтірді

АСТАНА, 18 сәуір – Sputnik. Алматыда сейсенбі күні кешке ер адам мен әйел кісі жол талғамайтын көліктің астына түсіп қаза болды, деп хабарлады Sputnik Қазақстанға оқиға куәгерлері. 

Кісі өлімімен аяқталған жол апаты Солтүстік шеңбер, Қарасу көпірінде болды. Оқиға куәгерлерінің сөзіне қарағанда, ер адам мен әйел көпірді рұқсат етілмеген жерден кесіп өтпек болған. Ер адам шамамен 35 жастарда, әйел — 40 жастар төңірегінде көрінеді. Көліктер ағылысынан Toyota Land Cruiser жүргізушісі жаяу жүргіншілерді байқамай, қағып кетті. Еркек пен әйел алған жарақаттардан жедел жәрдем келгенге дейін жан тапсырды.

Қатты соққыдан қауіпсіздік жастығы іске қосылған. Көлік айтарлықтай зақымданған.