АСТАНА, 31 наурыз — Sputnik. Ақмола облысында қару дүкенін тонап, екі күзетшіні өлтірген бір топ адам сотталды деп хабарлайды Sputnik Қазақстан тілшісі сот үкіміне сілтеме жасап.
Тергеу дерегі бойынша, Көкшетаудың екі тұрғыны тапаншаға ұқсайтын зат жасап алып, беттерін тұмшалап, фирмаға шабуыл жасамақшы болған, алайда олардың бұл әрекеті орындалмай қалады.
Кейін 2009 жылы тамыз айында күдіктілер түн ортасында "Сұңқар" дүкеніне кіріп қару-жарақ ұрлап, тығып қояды.
2010 жылы тамызда ер адамдар ұрланған қаруларымен лимонад цехына шабуыл жасап, екі күзетшісін өлтіреді. Қарақшылар сол жолы 621 мың 787 теңге ұрлап кеткен.
Мемлекеттік айыптау атап өткендей, күдіктілер қару сатып алып өткізген және өздері де жасап шығарған. Қарақшылық жасап, автокөлік айдап әкетуге тырысқан.
2016 жылы мамыр айында күдіктілер пулемет тапаншадан оқ ату үшін Көкшетауға орманға барады. Сол жерде оларды ІІД офицерлері байқап қалып, қызметтік көлікпен жандарына барған. Алайда күдіктілер қарсылық көрсетіп, полицейлерге пышақ салып, қашып кетеді. Полиция үш күдіктіні құрықтады.
Ақмола облысы қылмыстық істер бойынша мамандандырылған ауданаралық соты үш адамды бірқатар қылмыс жасағаны үшін айыпты деп таныды. Қылмыстық топтың басты екі мүшесі 23 және 15 жылға бас бостандығынан айырылды. Үшінші қатысушы бес жылға шартты жаза мерзіміне кесілді, себебі топтың іс-әрекетіне белсенді түрде араласпаған екен.
Бұдан бөлек, күзетшіні өлтірген қылмыскер қаза тапқандардың отбасына моралдік шығын ретінде 3 миллион теңге төлейді.
