АСТАНА, 31 наурыз — Sputnik. Жол қауіпсіздігін сақтау мақсатында жолаушылар пойызының бағдары өзгертілді деп хабарлайды "Қазақстан темір жолы" ҰК" АҚ баспасөз қызметі.
Ұлттық теміржол тасымалдаушысының мәліметінше, 30 наурызда Павлодар жол бөлімшесінің Дегелең-Май қума жолында тасқын су теміржолға залал келтірді. Соған байланысты №31 "Алматы-1-Павлодар", №376 "Астана-Лениногор", №67 "Защита-Астана", №68 "Астана-Защита" жолаушылар пойыздарының бағдары өзгеріп РФ аумағындағы "РТЖ" ААҚ-на қарасты Құлынды және Локоть станцияларымен жүре бастады.
Пойыздардың жолдағы мерзімі орташа алғанда 16 сағатқа дейін ұзаруы мүмкін.
Тасқын су салдарын жоюға арнайы штаб құрылды. Оқиға орнында 120 теміржолшы мен 63 арнайы техника жұмыс істеп жатыр. Қазіргі таңда "ҚТЖ" ҰК" АҚ қалпына келтіру жұмыстарын жүргізуде. Оқиға салдарын қысқа мерзімде, жедел жою қарастырылып жатыр.
