АСТАНА, 6 наурыз — Sputnik. Оңтүстік Қазақстан облысы Ақбұлақ ауылының жергілікті тұрғыны көшеден шақалақты тауып алған, полиция тастанды сәбидің анасын іздестіруде деп хабарлады өңірдің ІІД баспасөз қызметі.
Баспасөз қызметінің мәліметінше, 2017 жылы 4 наурызда сағат 16:45 кезінде Сайрам АІІБ-на аудандық ауруханасының жан сақтау бөліміне көшеден табылған нәрестенің түскендігі туралы хабар айтылған.
"Оқиға орнына келіп жеткен полицейлер анықтағандай, Ақбұлақ ауылының көше қиылыстарының бірінде жергілікті тұрғын әйел жол сөмкесінен жаңа туған нәресте қызды тауып алған. Әйел адам бірден жедел жәрдем шақырады. Дәрігерлер шақалақты аудандық ауруханаға жеткізіпті. Қазір нәрестенің жағдайы қанағаттандырарлық", — деп хабарлады ауруханада.
Жаңа туған сәбиін тастап кеткен әйел екі жылға бас бостандығынан айыру жазасына кесілуі мүмкін.
Қазір полиция әйелдің кім екенін анықтауда. Сот алды тергеу ісі жүргізіліп жатыр.
