АСТАНА, 24 ақпан — Sputnik. ҚР премьер-министрінің бірінші орынбасары Асқар Мәмин Ташкентке іссапары барысында Өзбекстан президенті Шавкат Мирзиёевпен кездесті деп хабарлады ҚР сыртқы істер министрлігінің баспасөз қызметі.
Ташкентте 23 ақпан күні Қазақстан мен Өзбекстан арасындағы екі жақты ынтымақтастық бойынша Бірлескен үкіметаралық комиссияның 16-шы отырысы өтті.
Кездесу барысында президент пен бірінші вице-премьер сауда-экономика саласындағы екі елдің өзара ынтымақтастығының әлеуеті жайында ой бөлісті.
Өзбекстан президенті Асқар Мәминді "Дустлик" орденімен марапаттау салтанатын өткізді. Бұл марапат Асқар Мәминге Өзбекстан Республикасы мен Қазақстан Республикасы арасындағы өзара тиімді қарым-қатынастарды жан-жақты дамытуға қосқан елеулі үлесі үшін, теміржол көлігі саласында елдер арасындағы ынтымақтастықты тереңдету мен кеңейтуге қосқан жеке үлесі үшін, сондай-ақ Орта Азия аумағында аймақаралық көліктік дәліздердің ірі жобаларын іске асыруға белсене араласқаны үшін тапсырылды.
