АСТАНА, 23 қаң — Sputnik. Қазақстан президенті Нұрсұлтан Назарбаев "Атамекен" ұлттық кәсіпкерлер палатасының басшылығымен кездесті деп хабарлайды Ақорда баспасөз қызметі.
Кездесу барысында президиум төрағасы Тимур Құлыбаев пен басқарма төрағасы Абылай Мырзахметов мемлекет басшысына Ұлттық палатаның 2016 жылғы қызметінің қорытындысы, республикадағы іскерлік қауымдастықтың дамуы және алдағы кезеңге жасалынған жоспар туралы баяндады.
Қазақстан президенті атап өткендей, үкімет бизнесті қолдау үшін үнемі табанды жұмыс істеп келеді.
"Бизнестің мемлекет тарапынан көрсетілген қамқорлық пен қолдауға жауап беретін сәті келді. Азаматтарды кәсіпкерлік саласына үнемі жұмылдыру, оның ел экономикасындағы үлесін арттыру бойынша тыңғылықты жұмыс атқарылуы тиіс", — деді Қазақстан президенті.
Палата басшылығы берген мәліметке сүйенсек, қазіргі уақытта шағын және орта бизнес үлесі ЖІӨ-нің 25%-н құрайды, онда 3 миллионнан астам адам еңбек етуде. 2016 жылы 11,2 трлн теңгеге өнім шығарылды, бұл 2015 жылмен салыстырғанда 6%-ға көп.
