АСТАНА, 21 жел – Sputnik. Ұлттық әуетасымалдаушы компания "Air Astana" АҚ Алматы әуежайындағы рейстердің жаппай кешігуіне түсініктеме берді.
Алматы халықаралық әуежайының мәліметінше, сәрсенбі күні сағат 8-де 26 рейс кешіктірілген. Олардың 12-сі "әуе компания шешімімен", тағы 12-сі "ұшақтың кешігіп келуінен" және екеуі қолайсыз ауа райы салдарынан бөгелген.
Sputnik Қазақстан агенттігі кешіккен 26 рейстің арасында ұшақтары бар Air Astana баспасөз қызметімен хабарласты. Әуе компаниясының өкілі қазақстандық әуетасымалдаушының кешіктірілуі борттардың жетіспеушілігі мен техникалық себептерге қатысты емес екендігін мәлімдеді.
"Рейстердің бөгелуіне басты себеп Астана, Орал, Үрімжі, Пекин қалаларындағы қолайсыз ауа райы. Техникалық себептер туындаған кезде әуе компаниясы резервтегі борттарды пайдаланады. Қазіргі уақытта рейстер кестесі толықтай қалпына келтірілді", — деп хабарлады Air Astana корпоративтік байланыстар менеджері Тілек Әбірахимов.
