АСТАНА, 15 жел — Sputnik. Қазақстан президенті Нұрсұлтан Назарбаев Өзбекстан президенті Шавкат Мирзиеевпен телефон арқылы сөйлесіп, оның барысында әңгімелесушілер екі жақты қарым-қатынастардың келешегін талқылады, деп хабарлайды Ақорданың баспасөз қызметі.
"Әңгімелесу барысында Шавкат Мирзиеев Қазақстан Республикасы Тәуелсіздігінің 25 жылдығымен құттықтап, халқымыздың одан әрі өсіп-өркендеуіне тілектестік білдірді. Өз кезегінде Нұрсұлтан Назарбаев Шавкат Мирзиеевті Өзбекстан Республикасы президенті қызметіне ресми түрде кіріскенімен құттықтады", — делінген баспасөз баянда.
Екі ел көшбасшылары сондай-ақ, ағымдағы жағдай мен екі жақты қарым-қатынастардың келешегін талқылап, Қазақстан мен Өзбекстан ынтымақтастығын жандандырудың маңыздылығын атап өтті.
Телефон арқылы сөйлесуге Өзбекстан жағы бастамашы болды.
