АСТАНА, 30 қар — Sputnik. ҚР парламентінің мәжіліс депутаттары пробация жөніндегі заң жобасын бір оқығаннан қабылдады деп хабарлайды Sputnik Қазақстан тілшісі.
ҚР ішкі істер министрі Қалмұханбет Қасымовтың мәліметінше, Қазақстанда 2012 жылдан бері пробацияның екі моделі қолданылып келеді – үкімдік және постпенитенциарлық. Үкімдік пробация бас бостандығынан айыру жазасына кесілмеген сотталғандарға қатысты іске асырылады, ал постпенитенциарлық – түрмеден шартты түрде мерзімінен бұрын босатылғандарға қатысты.
Ұсынылған "Пробация туралы" заң жобасы бұл тізімді кеңейтіп, елде сот алды және пенитенциарлық пробация енгізуді ұсынады.
"Сот алды пробация бойынша, күдіктілерге әлеуметтік-құқықтық көмек көрсетіліп, мінез-құлқын түзетуді мақсат етеді, басқа қылмыстық құқықбұзушылықтар жасауының алдын алады", — деді Қасымов сәрсенбі күні мәжілістің пленарлық отырысында.
Екінші модель – пенитенциарлық пробация бойынша, сотталғанның түрмеден шығуына бір жыл қалған кезде, оны бостандықтағы өмірге бейімдей бастайды.
