АСТАНА, 15 қар — Sputnik. "Құрметті азамат" жобасы Қазақстанда басталып кетті, жоба жеңімпазына Астанадан пәтер сыйға беріледі.
Жоба республика тәуелсіздігінің 25 жылдығына арналған. 14 қарашадан бастап 1 желтоқсанға дейін кез келген қазақстандық www.bi-azamat.kz сайтына кіріп, "Құрметті азамат" атағына үміткер ұсына алады. Бұл сіңірген еңбегі мен іс-әрекеті, идеялары немесе азаматтық ұстанымы қоғам алдындағы ерлік пен жауапкершіліктің үлгісі болған адам болуы шарт.
Тәуелсіз сараптама кеңесі 10-15 номинантты іріктеп алады, содан кейін желтоқсанның 5 мен 25 аралығында ғаламтор арқылы дауыс беру кезеңі өтеді.
Құрметті азаматтың есімі 26 желтоқсан күні жарияланады. Ірі құрылыс компаниясы жеңімпазға пәтер тарту етеді.
