Қара қиял мен тонға оранған жігіттер: қазақстандық дизайнерлер неден шабыттанады

Kazakhstan Fashion Week Алматыда басталды.
18-20 қазан аралығындағы ұлттық сән апталығы аясында отандық және шетелдік дизайнерлердің сән көрсетілімдері өтеді.

Kazakhstan Fashion Week аясында ұсынылатын коллекцияларының аты да ерекше - "Құмды дауыл", "Қара қиял", "Морокко".

Ұлттық сән апталығының он екінші маусымы жаңа тәртіпте өткізіледі. Дизайнер қатысушылардың көпшілігі - қазақстандықтар.

Шоколад пен құм түстес маталар, Тибет және жабайы Афирка этникасы, барқыт пен шілтері, жібек, шифон және аң терілері. Адамның ойына келмейтін киім үлгілері авторлардың ұшқыр қиялының арқасында сән подиумында жарық көрді.

Kazakhstan Fashion Week Орта Азиядағы ең ірі сән платформасы екендігін айта кеткеніміз жөн.

Өйткені Kazakhstan Fashion Week алғашқы кезеңінен бері қазақстандық көрермендер назарына Қазақстан, Ұлыбритания, Германия, Грузия, Голландия, Иран, Италия, Қытай, Қырғызстан, Ливан, Ресей, Румыния, АҚШ, Тунис, Өзбекстан, Украина, және Франция елдері дизайнерлерінің коллекциялары ұсынылды.

Kazakhstan Fashion Week аясында өтіп жатқан жас дизайнерлер байқауына келер болсақ, биыл оның қатысушылары көктем-жаз 2017 маусымына прет-а-порте коммерциялық коллекциясын шығару тапсырмасы берілді. 300-ден аса сұраным жіберілді. Әділқазылар 20 қатысушының 40 эскизін таңдап алды.

Мына үлгілерге қарасаңыз, осы бір тамаша шалбарлар әп-сәтте жеңіл шортыға да, спорттық киімге де, тіпті Бэтменнің костюміне де айналып кететін сыңайлы.

Көктем-жаз 2017 коллекциясына досье. Түс: қара, сұр, ақ. Негізгі өрнек - басылым мәтіні.

Сәнді трендтер, міне, осындай. Аталмыш маусымда тафта мен шифон маталары кең қолданыста болады.

Дизайнерлеріміздің қиялында шек жоқ екен. Жас дизайнерлер конкурсының финалына ТМД елдері өкілдері, атап айтқанда Қазақстан, Ресей және Қырғызстан азаматтары шықты.

Жеңіл силуэттер, көйлектер мен пальтолар әдемі үйлесім тапқан түстердің арқасында, қыз-келіншектердің көркін одан сайын аша түседі.

Жас дизайнерлер бес апта бойы коллекцияларын әзірледі.

Жұмыстарды қатал әділқазылар бағалады. Оның құрамында: Итальяндық дизайн институтының деканы, модельер, консруктор әрі технолог Андреа Този мен еліміздің сән әлеміндегі ең мықты дизайнерлер.

Табиғи маталардан тігілген ыңғайлы киімдер - Қазақстанның сәнді күзіне лайықты образдар.

Сән апталығы ұйымдастырушыларының айтуына қарағанда, биыл Kazakhstan Fashion Week подиумына алғаш рет балалар шығады.

Атап айтқанда, балалар киімінің алғашқы қазақстандық бренді Mimioriki Kazakhstan Fashion Week қонағы ретінде шақырылып, байқау финалы аясынада көрсетілетін коллекция әзірледі.

Бұл көрсетілімде дизайнерлер "Кішкентай ханзада" ертегісінің желісімен киінген балаларды шығарды.

Mimioriki - көптеген марапаттаулар иегері. Оның ішінде президенттік сыйлық "Алтын сапа" және "Мода России" байқауындағы жеңіс бар.

Көптеген танымал қазақстандық брендтер өз жолын Kazakhstan Fashion Week сән апталығынан бастаған.

Минимум-көйлек - айрықша үлгі.

Бұл маусымда конкурс жеңімпаздары тамаша сыйлықтарға ие болды. Үздік үш дизайнер Милан, Флоренция және Римдегі Instituto Europio di Design институтында жазғы тағлымдамадан өтеді.

Сәнқой бүлдіршіндер көрсетілім кезінде "жұлдыздар жаудырды".

Стилисттер мен визажисттер кішкентай модельдерді подиумға шығуға дайындады.

Қатысушы дизайнерлер айтқандай, осы коллекцияларға шабыт берген ерекше бояуларға толы Алматы алтын күзі екен.