АСТАНА, 29 қыр – Sputnik. Әсем Міржекеева Тәжірибелі педагог, Қарағанды мектептерінің бірінің тәрбие жөніндегі директор орынбасары 45 жасар Юрий Пак жалған терроризм бабы бойынша айыпталып, сотталу үстінде. Тергеу мен сот талқылауы кезінде қылмыстық істе ол куәгерден бас күдіктіге айналды.
Үрейлі қоңырау шалынды
Тергеу болжамына сәйкес, 2015 жылғы 14 сәуірде қарапайым мектеп мұғалімі, оқу орны ғимаратында, өзінің смартфонынан жедел әрекет ету қызметіне хабарласып, қарағандылық ЦУМ-ға жарылғыш зат қойылды деген хабарлама қалдырған. Үрейлі қоңырау түскеннен кейін, оқиға орнына қаланың барлық жедел қызметтері келіп жетті. ЦУМ қызметкерлері мен келушілері қауіпсіз жерге көшіріліп, ғимарат қоршауға алынды. Бірақ сауда үйі тінтілгеннен кейін жарылғыш зат табылмады. Сол кезде облыстық полиция таратқан баспасөз баянда бірнеше сағаттардан кейін болжамды "телефондық терроршы" ұсталды деп хабарланған. Дерек бойынша ҚР ҚК-нің 273-бабына сәйкес қылмыстық іс қозғалған.
Қоғам назарына ілінген істің сотта қаралып жатқанына үш айдан асып кетті. Юрий Пак бастапқыда сотта куәгер ретінде жауап берген, кейіннен ол бас күдіктіге айналды. Іс бойынша жәбірленуші ретінде Қарағанды қаласының ІІД, төтенше жағдайлар жөніндегі басқарма, жедел жәрдем стансасы мен сауда үйі танылды.
Үміт сәулесі жоқ, бәлкім болмайтын да шығар
Бұл істегі басты айғақ – телефон қоңырауының жазбасы. Сол жазба мұғалім кінәсінің айқын дәлелі немесе ақтауға себеп болып көрінеді. Алайда сот тағайындаған үш дауыс сараптамасы бұл істің мән-жәйін анықтай алмады. Ұстаз дауысының қосымша үлгілері алынып, қылмыстық іске қоса тіркелген диспетчер мен жалған терроршы арасындағы диалог жазбасымен салыстырылды.
"Бірінші сараптама Юраның телефон шалмағандығын көрсетті, ал қалған екеуі сол болғандығын растады. Неліктен? Қателік орын алуы мүмкін. Біздің адвокаттардың пікірінше, бірінші сарапшылар толық ықшамдалмаған аудио жазбаларды зерттеген. Ал басқа сарапшылар ықшамдалған жазбаларды тексерген. Файлдың өзгеруі оның сипаты мен сапасының өзгеруіне әкеліп соқтыруы мүмкін. Мүмкін содан қате кеткен болар", — деді Sputnik агенттігіне Юрийдің зайыбы Ольга Пак.
Сотталушының өзі айыпты емес екендігін айтып, "102" нөміріне қоңырау шалмағанын алға тартады. Іс бойынша куәгер ретінде өткен оның әріптестері, сол қарғыс атқан күні Юрий басқа мұғалімдермен бірге мектеп кабинеттерінің бірінде парталарды қозғады деп ант берді. Ал оның ұялы телефоны көрші кабинетте қалып қойған сөмкесінде болған.
