НҰР-СҰЛТАН, 13 шілде – Sputnik. Ирактың оңтүстігінде Ди-Кар провинциясындағы Эн-Насирия қаласында коронавирус жұқтырған науқастарға арналған ауруханадан өрт шықты. Қаза болғандар саны 54 адамға дейін жетті, деп хабарлайды РИА Новости.
Бұған дейін 38 адамның ажал құшқаны хабарланған еді.
Алдын ала ақпаратқа сүйенсек, ауруханадағы өрт оттегі баллонының жарылуынан болған. Өрт сөндірушілер тілсіз жауды ауыздықтады, бірақ кейбір науқастар әлі ауруханадан шыға алмай отыр.
Қазір Ирактың оңтүстігінде аптап ыстық, сынап бағанасы күндіз көлеңкелі жерде 50 градусты көрсетеді.
Иракта коронавируспен ауыратындарға арналған ауруханада өрт алғаш рет болып отырған жоқ. Сәуір айының соңында Багдад қаласында "Ибн аль-Хатыб" ауруханасы өртеніп, 82 адам көз жұмды, тағы 11 адам жарақат алды.
