Қазақстан, Әзербайжан, Армения, Қырғызстан және Өзбекстанның парадтық топтары, Беларусь қарулы күштерінің құрметті қарауыл ротасы және Молдова Ұлттық армиясының құрметті қарауыл ротасы, сондай-ақ Тәжікстанның қорғаныс министрлігі әскери институтының түлектері Қызыл алаңмен жүріп өтті. Барлығы Жеңіс парадына 15 мыңға жуық әскери қызметші, екі жүзден астам әскери техника, 75 ұшақ пен тікұшақ жұмылдырылды.
Қазақстан президенті Қасым-Жомарт Тоқаев Ресей басшысы Владимир Путиннің шақыруын қабыл алып, Жеңістің 75 жылдығына арналған әскери парадқа қатысты.
Ұлы Отан соғысы Қазақстан президентінің отбасы тарихында елеулі орын алады. Себебі Тоқаевтің әкесі майданда болған. Кемел Тоқаев 1942 жылы соғысқа аттанып, 1944 жылдың ортасында Польша аумағында ауыр жарақат алды.
Шеруден кейін Қасым-Жомарт Тоқаев басқа мемлекет көшбасшыларымен бірге "Белгісіз солдат" қабіріне гүл шоғын қойып, қаза тапқан батырларды бір минут үнсіздікпен еске алды.
