АСТАНА, 15 қараша — Sputnik. Аса ауыр салмақтағы бұрынғы әлем чемпионы Леннокс Льюис K.O. Artist Sports сайтына берген сұхбатында қазақстандық Геннадий Головкин мен мексикалық Сауль "Канело" Альварестің үшінші жекпе-жегін өткізуге қатысты өз ойын білдірді, деп хабарлады Sports.kz.
– "Канело" мен GGG екі рет жұдырықтасты, өте тартысты өтті, үшінші жекпе-жекті көргіңіз келе ме?
– Ия, мен үшінші жекпе-жекті көргім келеді. Бірінші жекпе-жек жақсы, екіншісі өте тамаша өтті, ал үшіншісі одан да керемет болады. Олар бір-бірімен айқасқанда ғажайып боксқа куә боласың. Жанкүйерлер үшін де солай.
– Бұл жекпе-жекте сіз үшін кім фаворит?
– Білесіз бе, "Канело" алғашқы жекпе-жекте мені ренжіткені рас, бірақ екіншісінде таңғалдырды. Үшіншісінде кім жеңсе де маған бәрібір. Үшінші жекпе-жек болатынын білемін және ол ең үздігі болады. Екеуі де бұл жекпе-жекті өткізгісі келеді.
