НҰР-СҰЛТАН, 25 тамыз – Sputnik. Алматыда Алаш арысы Ілияс Жансүгіровтың ұлы Саят Жансүгіров 91 жасында өмірден озды, деп хабарлайды Sputnik Қазақстан.
Ілияс Жансүгіровтың тұңғышы 8 жасында әкесінен айырылып, артынан анасы да көз жұмды. Содан Саят 13 жасында жұмыс істей бастаған.
"Әкем керемет адам еді. Ол мені тізесіне отырғызып алып тек жақсы сөздер айтатын. Менің әкем халықтың адамы ғой. Сол кездегі мейірімді бейнесі әлі көз алдымда. Әкеме деген жылылық әлі күнге жүрегімнен кетпейді. Жастайымнан ағайын-туыс, үйге келетін адамдардың бәрі әкеңе ұқсайсың деп айтатын. Мектепте, кейін Мәскеудегі Тау-кен университетінде орысша оқыдым. Жұмыста да өңшең орыстардың арасында болдым. Алайда тілімді сақтап қалдым", – деп еске алды Саят Ілиясұлы бір сұхбатында.
Тау инженері әкесінің өлеңдерін де аударып, газет-журналдарда жариялаған.
Айта кетері, Саят жазушының үшінші әйелі Фатима Төребаевадан туған. Қарындасы Сайра кішкентай кезінде шетінеп кеткен.
