НҰР-СҰЛТАН, 11 қаңтар – Sputnik. "Ақ жол" партиясының төрағасы Азат Перуашев Nur Otan және Қазақстанның халық партиясы лидерлерін сайлаудағы жеңісімен құттықтады.
Exit-poll нәтижесі бойынша мәжіліске үш партия өтті: Nur Otan; "Ақ жол" демократиялық партиясы ; Қазақстанның халық партиясы (бұрынғы коммунистер).
Оқи отырыңыз: Қоңыров Exit poll нәтижесіне қатысты ойын бөлісті
Партия төрағасы саяси ұйымды қолдаған отандастарына алғыс білдірді. Айтуынша, биылғы науқан қауіпті індетпен тұспа-тұс келді. Соған қарамастан барлық санитарлық талапты сақтай отырып, сайлау ұйымдастырылды. Бұл тәжірибе енді алдағы уақытта кәдеге жарап, еліміздің дамуына септігін тигізеді деп сенім білдірді партия төрағасы.
"Меніңшe, біздің партияларымыз, біздің сайлаушыларымыз өздері үшін өте жақсы тәжірибе жинап алды. Ол тәжірибе ары қарай да еліміздің дамуына, елімізді демократияландыруға өте пайдалы, өзекті болады деп ойлаймын. Соған сенімдіміз және мен барша "Ақ жол" партиясы үшін дауыс берушілерге өз алығысымды білдіремін", - деді Перуашев "Хабар 24" арнасының эфирінде.
Ол "Ақжол" халық сенімін ақтауға тырысатынын атап өтті.
"Оған еш күмән болмасын және әріптестерімді – басқа да партиялар көсемдерін, Тұңғыш президентімізді құттықтаймын", - деп түйіндеді Азат Перуашев.
