НҰР-СҰЛТАН, 15 желтоқсан – Sputnik. Денсаулық сақтау министрлігінің өкілі Роза Қожапова алдағы мереке және демалыс күндері сауда ойын-сауық орталықтары қалай жұмыс істейтінін айтты, деп хабарлайды Sputnik Қазақстан тілшісі.
"Мереке күндері сауда орталықтары әр өңірде эпидемиологиялық жағдайға байланысты әртүрлі жұмыс істейді", – деді жұқпалы ауруларды эпидемиологиялық қадағалау басқармасының басшысы Роза Қожапова.
Ол орталық коммуникациялар қызметінде өткен баспасөз мәслихатында астана "қызыл" зонада тұрса да, елордаға кіріп-шығуға шектеу жоқ екенін нақтылады.
Елорда әкімдігінің ресми сайтында қаланың бас санитар дәрігері шығарған бұрынғы қаулының талаптары сол күйінде сақтала беретіні жазылған. Атап айтқанда, 16-18 желтоқсанда сауда орталықтары түнгі сағат 23:00-ге дейін жұмыс істейді. Ал 19 желтоқсан, сенбі күні жұмыс уақыты 20:00-ге дейін қысқарады.
"20 желтоқсан, жексенбі күні ірі сауда орталықтарындағы бутиктердің жұмысы тоқтатылады. Онда дезинфекциялық шаралар жүргізілетін болады. Ірі сауда және ойын-сауық орталықтарында орналасқан дәріханалар, гипермаркеттер, азық-түлік дүкендері клиенттерге жексенбіде қызмет көрсете алады", - делінген ресми хабарламада.
Бүгінгі күні Қазақстан коронавирустың таралуы бойынша "жасыл" аймақта тұр.
Оқи отырыңыз: Мереке күндері қоғамдық көлік қалай жүреді
"Қызыл" аймақта – Нұр-Сұлтан қаласы. "Сары" аймаққа жеті өңір – Шығыс Қазақстан, Атырау, Ақмола, Қостанай, Павлодар, Солтүстік Қазақстан облыстары және Алматы қаласы енген. Қалған өңірлер – "жасыл" аймақта.
