НҰР-СҰЛТАН, 25 қараша – Sputnik. Дариға Назарбаева Nur Otan партиясы атынан мәжіліс депутаттығына үміткер болды, деп хабарлайды Sputnik Қазақстан тілшісі.
Nur Otan партиясының кезектен тыс XX съезінде мәжіліс депутаттығына 126 кандидат бекітілді. Олардың 49-ы Орталық партиялық квота бойынша үміткер болды.
Мәжіліс депутаттығына орталық партиялық квота бойынша кандидат болғандардың арасында Дариға Назарбаева, Нұрлан Нығматулин, Асқар Мамин, Бекболат Тілеухан, Ахметжан Есімов, Тамара Дүйсенова, Бауыржан Байбек, Айдос Сарым, Ерлан Сайыров және тағы басқалары бар.
Айта кетейік, кандидаттардың жалпы тізімінде парламент мәжілісінің қазіргі депутаттары 20%-тен аспайды, мемлекеттік басқару саласының өкілдері – 13%, білім және денсаулық сақтау саласы – 12%, үкіметтік емес ұйымдар – 9% және өнеркәсіп – 8%.
Оқи отырыңыз: "Қорықпау керек": мәжіліс сайлау туралы заңға өзгерістер енгізді
Сондай-ақ, экономистер – 28%, заңгерлер – 20%, кәсіпкерлер – 17%. Ал 21 үміткердің ғылыми дәрежесі бар, оның ішінде 10-ы – ғылым докторы, 11-і – ғылым кандидаты.
Тізімнің үштен бірі – әйелдер. Кандидаттардың орташа жасы бұрынғы партиялық тізімдермен салыстырғанда 4 жылға төмендеп, 48 жасты құрады.
