00:26 22 Қазан 2021
Тікелей эфир
  • USD425.71
  • EUR495.53
  • RUB5.99
Қоғам
Қысқа сілтеме алу
1784 0 0

Енді грантпен оқып, артынан ақылы бөлімге ауысып кеткен студенттер мемлекеттік тапсырыспен оқыған мерзімін міндетті түрде еңбекпен өтейді

НҰР-СҰЛТАН, 30 қыркүйек – Sputnik. Мәжіліс депутаттары білім беру мәселелері бойынша кейбір заңнамалық актілерге өзгерістер мен толықтырулар енгізу туралы заң жобасын бірінші оқылымда мақұлдады, деп хабарлайды Sputnik Қазақстан тілшісі.

Қосарлы оқыту және грантты өтеу

Депутат Әбдіманап Бектұрғановтың айтуынша, заң жобасы аясында бірнеше өзекті мәселені шешу жоспарланып отыр. Мәселен, бүгінде қосарлы оқытуға (дуальное обучение) қатысты құқықтық коллизия бар. Еңбек кодексінде қосарлы оқыту жүйесімен білім алатындардың өндірістік оқу мен кәсіби іс-тәжірибеден өту уақыты еңбек өтілі ретінде есептеледі. Алайда тура осы кодексте еңбек өтілін растайтын құжаттар тізбесінде қосарлы оқыту туралы келісімшарт көрсетілмеген.

"Іс жүзінде осы коллизияға байланысты жұмыс берушілер қосарлы оқыту шарты негізінде өндірістік оқыту мен кәсіптік практикадан өту кезеңін есепке алмай отырады", - дейді Бектұрғанов.

Бұдан бөлек, жаңа заң жобасы аясында техникалық және кәсіптік мамандарды даярлауға мемлекеттік тапсырыс беру қағидаларын бекіту жоспарланған. Атап айтқанда, мемлекеттік тапсырыс жұмыспен қамту органдары мен кәсіпкерлік палаталарының ұсыныстары негізінде жасалады. Ал, ең бастысы, әрбір өңірдің еңбек нарығындағы сұраныс ескерілуі шарт.

"Ал жоғары оқу орындарына берілетін мемлекеттік тапсырыста оқу ұзақтығына қарай кәсіби түрде еңбекпен өтеу мерзімін белгілеу ұсынылады. Осылайша, мемлекеттік тапсырыс бойынша білім алған азаматтар бүкіл кезеңде барлық үш жылды да жұмыспен өтейтін болады. Ал басында ақылы негізде оқып, артынан грантқа ауысқандар, я болмаса, керісінше, алдымен грантта, одан кейін ақылы жүйеге ауысып кеткендер пропорционалды түрде өтейді", - деп түсіндірді Бектұрғанов.

Оқи отырыңыз: Қазақстанда күзгі каникул қашан басталады 

Айта кетейік, Қазақстанда педагогикалық, медициналық, малдәрігерлік және ауыл шаруашылығы мамандықтарының түлектеріне арналған грантты өтеу талабы бұрыннан бар. Өтеу мерзімі – оқу бітіргеннен кейін кемінде 3 жыл.   

Мектептің жарғысы өзгереді

Сондай-ақ, заң жобасы бойынша базалық білімді тексеруге арналған "Білім беру жетістіктерінің мониторингі" атты білімді сырттай бағалаудың жаңа моделін енгізу ұсынылып отыр.

"Халықаралық тәржірибені ескере отырып, білім беру ұйымдарын сыртқы бағалау тетігі жетілдіріледі. Бұл білім алушылардың білім сапасын арттыруға мүмкіндік береді", - дейді Бектұрғанов.

Тағы бір түзетуге сәйкес, қосымша білім беру ұйымдарына да мемлекеттік тапсырысты орналастыру жоспарланған. Соның арқасында қосымша біліммен тегін қамтылатын балалардың саны артады. Ал мектептерде тыйым салынған заттардың тізімі енгізіледі.

Білім және ғылым вице-министрі Шолпан Каринованың айтуынша, бүгінде мектепке тыйым салынған заттарды әкелетіндер бар. Бірақ балалардың қалтасын ақтарып, тексеріп отыруға рұқсат жоқ. Ал жаңа заң аясында білім беру ұйымдарының жарғысына өзгеріс енгізіліп, тиісті нормалар жазылады. 

"Әлеуметтік педагогтар мониторинг жасап, психологтармен бірге ондай балалармен тығыз жұмыс істейді", - дейді Каринова.

Тақырып бойынша

Грантсыз қалған ЖОО-лардың тізімі жарияланды 
Сенаторлар қашықтан оқытуға байланысты мектептерде қосымша сабақ енгізуді ұсынды
Нұр-Сұлтанда мектепке барып жүрген оқушыдан коронавирус табылды
Өскемендік оқушы халықаралық олимпиадада күміс медаль алды
Аймағамбетов: болашақ педагогтер кешеден бері жоғары стипендия ала бастады
Кілт сөздер:
оқушылар, студенттер, білім гранттары
Загрузка...

Басты тақырып