АЛМАТЫ, 10 cәуір – Sputnik. Президент көмекшісі Аида Балаева төтенше жағдай кезінде табысынан айырылғандарға берілетін төлем жайлы пікір білдірді, деп жазады Sputnik Қазақстан.
Президент көмекшісінің айтуынша, азаматтардан барлығы 3,4 миллион өтінім түскен.
"Әлеуметтік желіде кейбір пайдаланушылар төтенше жағдай кезінде табысын жоғалтқан адамдарға 42 500 теңге төлеуге қатысты сұрақтарды әлі де қойып жатыр. Бұл бағытта жүйелі жұмыс жүргізілуде. Еңбек және халықты әлеуметтік қорғау министрлігінің мәліметіне сәйкес, бүгінгі күні барлық талапқа сай 1 782 632 өтінім келіп түсті", - деді Балаева.
Айтуынша, төлем 538 983 адамға тағайындалып, азаматтарға жіберілген.
"Аталған акция аясында 22,9 миллиард теңге аударылды. Жаңа деректер бойынша сіздерді хабардар етіп отырамын", - деп жазды Балаева Facebook парақшасында.
Айта кетейік, мемлекет басшысы Қасым-Жомарт Тоқаевтың тапсырмасымен төтенше жағдайға байланысты табысынан айырылған азаматтарға ең төменгі жалақы - 42 500 теңге көлемінде қаржы беріледі.
