НҰР-СҰЛТАН, 2 маусым — Sputnik. Алматы облысындағы Қасымбек ауылында үш жігіт ескерту айтқан ер адамға жабылып, дәрігер болып істейтін әйелін де соққыға жықты. Әлеуметтік желіде оқиғаның видеосы тарады, деп хабарлайды Sputnik Қазақстан.
Посмотреть эту публикацию в Instagram
Видео авторының айтуынша, таңертең отбасы үйден жұмысқа шығып келе жатқанда қақпаның алдында дәрет сындырып тұрған ер адамды көрген. Оған отағасы ескерту жасапты.
"Мас жігіт әкеме былапыт сөзбен жауап берген. Сосын оны итеріп, жанжал шығара бастады. Әкем көліктен шығып, оларды қуып жібергісі келді. Бірақ үшеуі жабылып кетті. Анам шығып еді, оны да соққыға жықты. Бізді атып тастаймыз деп қорқытты. Барлығы мас болды, рөлде отырған жігіт те ішіп алған", - дейді ол.
Оның сөзіне қарағанда, әкесінің басы жарылып, миы шайқалған. Ал дәрігер болып жұмыс істейтін анасының ерні жарылыпты.
Алматы облыстық полиция департаменті оқиғаның бүгін болғанын хабарлады. Жамбыл аудандық полиция бөлімшесіне әйел арыз түсіріп, күйеуін ұрып кеткен үш белгісіз адамға шара қолдануды талап етті.
"Тексеріс кезінде осы ауылдың 22-24 жастағы үш тұрғыны ұсталды. Қылмыстық кодекстің 293-бабы, 2-тармағы – "Бұзақылық" бойынша сотқа дейінгі тергеу басталды. Дене жарақатының ауырлығын анықтау мақсатында сот-медициналық сараптама тағайындалды", - дейді полицейлер.
Тәртіп сақшылары ұсталған екі жігіттің мас болғанын растады.
