АЛМАТЫ, 12 сәуір – Sputnik. Ақтөбеде такси жүргізуші қағып кеткен қыз түрлі жарақатпен ауруханаға түсті, деп хабарлады жергілікті "Мой Город" басылымы.
Апат 8 сәуірде №12 ықшам ауданындағы жаяу жүргіншілер жолында болған. ВАЗ автокөлігінің жүргізушісі 12 жастағы қызды қағып, оқиға орнынан кетіп қалған.
Жергілікті полицияның хабарлауынша, кәмелетке толмаған қыз Ақтөбе қаласы Жедел медициналық жәрдем ауруханасына жатқызылды.
"Дереу "ұстау" жоспары жарияланып, нәтижесінде патрульдік полиция қызметкерлері жол апатына себепкер автокөлік иесін тоқтатты. Көлікте мобильді қосымша арқылы жеке тасымалдаумен айналысатын 59 жастағы жүргізуші болды", - деді полиция.
Сараптама көлік жүргізушінің мас болмағанын көрсетті. Аталған факті бойынша тергеу жүріп жатыр.
