НҰР-СҰЛТАН, 26 наурыз – Sputnik. Солтүстік Қазақстан облысында білім бөлімінің қызметкерлері пандемия кезінде оқушылар үшін сатып алынған ноутбуктерді ұрлаған. Бұл фактіге қатысты сотқа дейінгі тергеу басталды, деп хабарлайды Sputnik Қазақстан тілшісі.
СҚО-ның сыбайлас жемқорлыққа қарсы қызметі облыс аудандарының бірінде әкімдіктің білім бөлімінің қызметкерлеріне қатысты сотқа дейінгі тергеуді бастады, деп мәлімдеді сыбайлас жемқорлыққа қарсы іс-қимыл агенттігінің аса маңызды істер жөніндегі тергеушісі Данияр Бекайдаров.
"Білім бөлімінің қызметкерлері пандемия кезінде аудандағы тұрмысы төмен отбасылардың балаларына арнап үкімет резерві есебінен сатып алынған ноутбуктердің бір бөлігін жымқырды деген күдікке ілінді", – деді ол брифингте.
Айтуынша, бұл қылмыстан мемлекетке 12 миллион теңгеден астам шығын келген.
Істің мән-жайы тергеу мүддесіне байланысты жария етілмейді.
Оқи отырыңыз: Шымкентте тегін таратылуы тиіс дәрілерді ұрлаған сатушы ұсталды
Бекайдаров бұл іске қатысты соңғы шешім тергеу нәтижесі бойынша қабылданатынын айтты.
