АЛМАТЫ, 25 ақпан – Sputnik. Алматыда өткен тәуліктен бастап жауған қардың қалыңдығы 20-30 сантиметрге жетті, деп хабарлайды Sputnik Қазақстан.
Тау бөктерінде 30-40 сантиметр қар жатыр.
24 ақпанда Алматыда сағат 16.00-де қар аралас жаңбыр жауа бастады. 25 ақпанда сағат түнгі бір шамасында ауа температурасы -10 градусқа дейін төмендеп, арты қарға ұласты.
Қала әкімдігінің хабарлауынша, 25 ақпан сағат таңғы тоғызға дейін қалада 20-30 сантиметр, таулы және тау бөктерінде 30-40 сантиметр қар жауды.
"Көктайғақтың алдын алу үшін қар жауған кезден бастап жолдарға, қиылыстарға, тау бөктері мен таулы аймақтарда қар тазаланды. Көктайғаққа қарсы 4 867 тонна материал себілді", - деп хабарлады қала әкімдігінің баспасөз қызметі.
Қар тазалау жұмысына 653 техника, оның ішінде 205 құмлақтырғыш пен 1 653 жұмысшысы жұмылдырылған.
"Түнгі сағат 03.00-ден бастап қар күреушілерге патрульдік полиция көлігі еріп жүрді. Жаяу жүргіншілер аймақтарын, қоғамдық көлік аялдамаларын, автотұрақтар, үстіңгі өткелдердегі қарды тазарту жұмыстары жүргізілуде", - делінген ақпаратта.
Айта кетейік, таңғы қарбаластан кейін қар сыртқа шығарылады.
Қазгидрометтің мәліметінше, қалада бүгін де қар жауады.
