АСТАНА, 4 қараша — Sputnik. Оралда құрылыс алаңындағы шұңқырдан табылған баланы анасы үйіне алып кеткісі келеді, деп жазды "Мой город".
Маусымда құрылысы жүріп жатқан үйдің жанынан күзетші жылап жатқан баланы тауып алады, оны 21 жастағы жергілікті тұрғын тастап кеткені анықталды. Әйелдің айтуынша, ол қаладағы сәбилер үйін таба алмағандықтан, баласын шұңқырға тастап кеткен.
Қазіргі таңда бес айлық бала сәбилер үйінде.
"Баланы қамқоршылардың рұқсатымен анасы мен әжесі көріп тұрады. Ол (анасы – ескерт.) оны алып кеткісі келіп жүр, сот шешімін күтіп отыр", — деді сәбилер үйінің бас дәрігері Мария Құбашева.
Білім бөліміндегі балалардың құқықтарын қорғау секторының меңгерушісі Агиис Бержанованың айтуынша, баланың әкесі ДНҚ талдау жүргізіп, өзінің ұлы екені расталса, асырап алғысы келетінін айтқан.
