АСТАНА, 27 қаң – Sputnik. Ақтауда Шетпе кентінің 33 жасар тұрғыны егіздің орнына үшем дүниеге әкелді деп хабарлайды Маңғыстау облыстық перинаталдық орталығы.
Үшемнің анасы Ақмаралдың айтуынша, — соңына дейін "егіз" деп күтіп, үшем екенін білмеген. Енді алтын құрсақ ана "Алтын Алқа" иегері болады.
Бірінші болып салмағы 2 килограмм 270 грамм қыз бала дүниеге келді, екіншісі ұл бала – салмағы 2 килограмм 480 грамм, үшіншісі қыз бала – 1 килограмм 980 грамм. Сәбилерге Медина, Нұрислам, Адина деген есімдер берілді.
Дәрігерлердің айтуынша, балалар сәл шала туылғанымен, денсаулықтары дұрыс.
